🙏🏻ஓம் கம் கணபதயே நம:🙇... கட்டுரை

 🙏🏻ஓம் கம் கணபதயே நம:🙇

நாம் எந்தக் காரியத்தை ஆரம்பித்தாலும் முதலில் வணங்கி வழிபடுவது சக்தியின் மைந்தன் சித்திகளைத் தரும் ஸ்ரீமகா
கணபதி பெருமானையே. நம் இடர்களை நீக்கி வினைகளைக் களைந்து நாம் ஆரம்பிக்கும் செயலை குறைவற நிறைவேற்றித் தருபவர் ஈசன் மகன் ஞானகணேசனே.

விநாயகர் வலம்புரி, இடம்புரி என்று இரண்டு விதமாகக் காட்சி தருவார். அவரது தும்பிக்கை வலப்பக்கம் திரும்பியிருந்தால் வலம்புரி விநாயகர் என்றும் இடப்பக்கம் திரும்பியிருந்தால் இடம்புரி விநாயகர் என்றும் நாம் அறிவோம். அவருக்கு சித்தி (Sidhdhi), ரித்தி (Ridhdhi) என இரு மனைவியர் உண்டு. நம் நாட்டில் பிரம்மசாரியாகக் கூறப்படும் கணபதி மற்ற மாநிலங்களில் இரு மனைவியருடன் வழிபடப் படுகிறார். கணபதியின் வலப்பக்க தும்பிக்கை சித்தியையும், இடப்புறம் ரித்தியையும் குறிக்கிறது.

இடம்புரி விநாயகரே பெரும்பாலான ஆலயங்களில் காட்சி தருவார். இவரே எளிய மனிதர்கள் பூஜிக்கவும், வணங்கி வழிபடவும் ஏற்றவர் என்பதுடன் உலகியல் ரீதியான நல்ல வாழ்க்கை, செல்வம், உடல்நலம் போன்ற லோகாதயமான ஆசைகளையும், வேண்டுதல்
களையும் நிறைவேற்றுபவர்.

வலம்புரி விநாயகரை வேத முறைப்படி வழிபட வேண்டும்.தினமும் தவறாமல் அபிஷேகம் செய்து, தோய்த்து உலர்த்திய சுத்தமான ஆடைகளையே அணிவிக்க வேண்டும். செந்நிற சந்தனத்தை நெற்றிக்கு இட வேண்டும். புதிய மலர்கள் மற்றும் அருகம்புல்லினால் அலங்காரமும், அர்ச்சனையும் செய்து, பழ வகைகள் மற்றும் மோதகம், லட்டு, கொண்டைக்கடலை சுண்டல் இவற்றை நிவேதிக்க வேண்டும்.வாசனை அகர்பத்திகளுடன் நெய் விளக்குகளை ஏற்ற வேண்டும்.  மந்திரங்கள் சொல்லி கற்பூர ஆரத்தி காட்ட வேண்டும்.

வேத நெறிகளைப் பின்பற்றி மந்திரங்களுடன் செய்யப்படும் முறையான பூஜையை உடல் மற்றும் மன சுத்தியுடன் தன்னலமின்றி செய்பவரை கணபதி மிக உயர்ந்த நிலையில் சிறப்பாக வாழ வைப்பார். வலம்புரி விநாயகர் சூரிய அம்சம் கொண்டவர். இது பிங்கள நாடியைக் குறிக்கிறது.

வலது தும்பிக்கையின் வழியாகப் பாயும் சூரியனின் ஆற்றலில் பிரம்மா, சிவன், விஷ்ணு ஆகிய மும்மூர்த்திகள் வசிக்கின்றனர். கோடான கோடி சூரியனின் அருள் பெற்ற சிலை. பிங்கள நாடி என்பது  மனதைக் கட்டுப்படுத்தும் நரம்பு மண்டலத்தை உடையது.

இந்த விநாயகரின் வடிவம் பிங்கள நாடியின் வெப்ப சக்தியை ஆன்ம உடலில் கொண்டுள்ளது. எனவே, அவர் மிகவும் சக்தி வாய்ந்தவர்.
ஒருவர் விரும்புவதைக் கொடுக்கும் அபார சக்தி அவருக்கு உண்டு.  நினைத்த
தையும், வேண்டுதல்களையும் உடன் நிறைவேற்றும் தன்மை கொண்டவர்.

இவருக்கு உரிய மந்திரமான 'ஓம் ஸ்ரீ கணேசாய நமஹ' என்ற மந்திரத்தை சித்தி விநாயக சிலைக்கு முன் 108 முறை உச்சரிப்பது அனைத்து முயற்சிகளிலும் வெற்றியைத் தரும். மாணவர்கள் இந்த மந்திரத்தை உச்சரித்தால் படிப்பில் நன்றாக பிரகாசிப்
பார்கள். 'ஓம் கம் கணபதயே நமஹ' என்ற மந்திரத்தை உச்சரிப்பதால் எந்த ஒரு செயலையும் தொடங்குவதற்கு முன் இருக்கும் தடைகள் அனைத்தும் நீங்கும்.

வலம்புரி விநாயகர் பற்றி நம் மகா பெரியவர் வாக்காக தெய்வத்தின் குரல் மூன்றாம் பாகத்தில் உள்ள செய்தியை இங்கு பகிர்ந்து கொள்கிறேன்.

ஃஃஃஃஃஃஃஃ
வலம்புரியானை வலம் புரிவோம்!
தெய்வத்தின் குரல் (மூன்றாம் பகுதி)
குட்டிக்கொள்வது, தோப்புக்கரணம் போடுவது, சிதறு தேங்காய் உடைப்பது, எருக்கும் அருகும் அர்ச்சனை பண்ணுவது, மோதகம் நிவேதிப்பது இவையெல்லாம் பிள்ளையார் வழிபாட்டில் விசேஷமாயிருக்கிறாற்போலவே அவரைப் பலமுறை பிரதக்ஷிணம் பண்ணுவதும் ஒரு விசேஷமாகும். பிள்ளையார் சுழி போடுகிறபோதும் பிரதக்ஷிணக் கிரமத்தில்தான் கொம்பை ஆரம்பிக்கிறோம்! பிள்ளையாரை குறைந்தது, மூன்று தடவை பிரதக்ஷிணம் பண்ணுவது வழக்கம். இருபத்தியோரு தடவை, நூற்றியெட்டுத் தடவை என்றெல்லாம் சுற்றிச் சுற்றி வருவார்கள். பார்வதி பரமேச்வரர்களை ஸர்வ பிரபஞ்சமாகவும் புரிந்து கொண்டு வலம் வந்து பலம் (பழம்) பெற்ற விக்னேச்வரரை நாமும் வலம் வந்தால் ஸகல பலனும் பெறலாம். அவருடைய தொப்பை வயிறே உருண்டையாகப் பிரபஞ்சம் மாதிரிதானே இருக்கிறது? அவரை வலம் வருவதே நமக்கு பலமுமாகும் — தேஹபலம், புத்திபலம் எல்லாம்!

அவரே வலம்புரி விநாயகராகவும் இருக்கிறார். விக்னேச்வரர் மூர்த்தத்தில் ஏகப்பட்ட ரூப பேதங்களிருந்தாலும் பொதுவாக நாம் பார்க்கிற பிள்ளையார்கள் தும்பிக்கையை இடது பக்கமாகச் சுழித்துக் கொண்டிருப்பவையாகவே இருக்கும். அபூர்வமாகச் சில இடங்களில் வலது பக்கம் தும்பிக்கையைச் சுழித்துக் கொண்டிருப்பார். இவரைத்தான் வலம்புரி விநாயகர் என்பது. தக்ஷிணா வர்த்தமாக உள்ள சங்கை எப்படி வலம்புரிச் சங்கு என்று சிறப்பிக்கிறோமோ அப்படியே வலம்புரி விநாயகருக்கும் விசேஷமான அனுக்ரஹ சக்தி இருப்பதாக ஆகமத்தில் சிறப்பித்திருக்கிறது. இப்படித் தும்பிக்கை வலமாகச் சுழித்திருக்கிறபோதுதான் (இது பிள்ளையாரே போடும் சுழி! தம்முடைய ஒரு அங்கத்தாலேயே போடுகிற சுழி!) அவருடைய வாயின் வலது ஓரத்தில் ஆரம்பித்து, கன்னம், மஸ்தகம் [சிரஸ்] இவற்றைச் சுற்றிக்கொண்டு, இடது பக்கம் தும்பிக்கை வழியாக இறங்கி, அதன் சுழித்த முடிவுக்கு வந்தால், இந்த அவுட்லைன், க்ரந்தாக்ஷர ‘ஓம்’ (தமிழ் ‘ஓ’ மாதிரி) இருக்கும். இடது பக்கம் தும்பிக்கையைச் சுழித்த பிள்ளையார் ரூபத்தில் இப்படி ப்ரணவ ஸ்வரூபம் கிடைக்காது. இது வலம்புரியின் விசேஷம்.

வலம்புரி விநாயக க்ஷேத்ரங்களில் கும்பகோணத்துக்குக் கிட்டேயிருக்கிற ‘திருவலஞ்சுழி’ என்றே பெயர் பெற்ற ஸ்தலம் விசேஷமானது. அதனுடைய மஹிமையைக் காட்ட ஒன்று சொல்கிறேன்.

மயூரேச க்ஷேத்ரமான மஹாராஷ்டிர மோர்காமின் க்ஷேத்ர புராணத்தில் நம் தமிழ்நாட்டுத் திருவலஞ்சுழியை உசத்திச் சொல்லியிருக்கிறது! ‘தசஷிணாவர்த்தம்’ என்று இதற்கு அங்கே பெயர் கொடுத்திருக்கிறது. ‘தக்ஷிண’–வல; ‘ஆவர்த்தம்’–சுழி. இந்த ‘தக்ஷிணாவர்த்தம்’தான் பிள்ளையாருடைய ராஜதானி, அதாவது Capital என்று சொல்லியிருக்கிறது.
திருவலஞ்சுழியில் சிவன் கோயிலில் ஒரு ஸந்நிதியாகத்தான் வலம்புரிப் பிள்ளையார் இருக்கிறார். நாம் இங்குள்ள வெள்ளைப் பிள்ளையார் பற்றி அறிவோம்.
திருவலஞ்சுழியில் இன்னொரு விசேஷம். கோவிலுக்குள்ளே ஒரு விநாயகர் தும்பிக்கையை வலது பக்கம் சுழித்துக் கொண்டிருப்பது போலவே இங்கே காவேரியும் திரும்பி வலது பக்கமாக சுழித்து ஓடுகிறது!

காவேரிக்கும் விக்நேச்வரருக்கும் கிட்டின ஸம்பந்தமுண்டு. குடகு தேசத்தில், ஸஹ்ய பர்வதத்தில் அகஸ்தியர் கமண்டுலுவுக்குள் பொத்திப் பொத்தி வைத்துக் கொண்டிருந்த காவேரியைப் பிள்ளையார்தான் காக்காய் ரூபத்தில் வந்து கவிழ்த்துவிட்டு, லோகோபகாரமான புண்ய நதியாக ஓட வைத்தார். நம் தமிழ் நாட்டின் உடம்பு, உள்ளம் இரண்டையும் வளர்க்கிற காவேரியைக் கொடுத்தவர் என்பதற்காகப் பிள்ளையாரிடம் நாம் விசேஷமாக பக்தி செலுத்தக் கடமைப்பட்டிருக்கிறோம்.

குடகிலிருந்து கர்நாடக தேசத்தைத் தாண்டித் தமிழ்நாட்டில் பாய்ந்த காவேரி கும்பகோணம் தாண்டினதும் ஒரு பிலத்துக்குள் மறைந்துவிட்டாளாம். அப்போது ஹேரண்டர் என்ற மஹரிஷி பரம கருணையோடு தம்மையே பலி கொடுத்துக்கொண்டாராம். உடனே காவேரி பிலத்துக்குள்ளேயிருந்து பொங்கிக் கொண்டு வெளியிலே வந்து இந்தப் பிள்ளையார் க்ஷேத்ரத்தைப் பிரதக்ஷிணமாக, வலப் பக்கம் சுழித்துக் கொண்டு மேலே ஓடினாளாம்....
ஃஃஃஃஃஃஃ

இவ்வளவு சிறப்பு பெற்ற திருவலஞ்சுழியின் அருகில் அமைந்துள்ள நம் புண்ய க்ஷேத்திரத்தில் நம் அருகிலேயே
ஸ்ரீசெல்வ விநாயகர் ஆலயம் அமைந்திருப்பது நம் அதிர்ஷ்டம்தான்.

மன வேற்றுமைகளும், கோப தாபங்களும், பிரச்னைகளும் மனிதர்களுக்குள் இருப்பது இயல்பே. அவற்றை இறைவனிடம் காட்டுவது தவறன்றோ? புண்ய க்ஷேத்திரவாசிகளுக்கு வேண்டிய வரங்களை வாரி வழங்கிட ஸ்ரீ செல்வ கணபதி ஒய்யாரமாக அமர்ந்திருக்க, ஒதுங்கிச் செல்வது மடமையன்றோ?

நம் புண்ய க்ஷேத்திரம் சீரும், சிறப்பும், நலமும், வளமும் பெற்று உயர்வான நிலையை அடைய க்ஷேத்திரவாசிகள் அனைவரும் இணைந்து இறைவனை வழிபடுவோம்🙏🏻.

நாளை தொடங்கவிருக்கும் சுபகிருது புத்தாண்டில் அனைவரும் சுபமும் கீர்த்தியும் பெற்று இனிதே வாழ வாழ்த்துக்கள் 🙏🏻